قلت كلامي..

قلت كلامي

يا الدنيا ..يا الساهرة و الحالمة ..
قريتي لحساب و نسيتي لحباب،
يا لي قالوا نحلة و طيارة..
جنينا من لشجار ثمارة و شطارة،
و من قولهم وعود …وريحة الشكارة
قلت كلامي و لا قصايد العطارة،
فين مشيتي تبيع الرخيص و تشري الغالي… يا جايل ف العلالي،
من جبالنا لرمالنا ..
تحدث و تقول كان يا مكان…
و تاكل الغلة و تنكر الملة،
رباتك الطريق ما تعلمتي غي الهدرة،
و نخوة الشعر، و حديث الشعير
ترحل بالنقرة الحرة و زرابي غالية…
و سواك حار …و كحل العيون الصافية…
قلت كلامي على الغاشي،
و هدرة مزوقة بالقوافي..
غدارة نكارة ..، خاينة لتاريخ الدروب و الحومة و كل ما رضعنا من لميمه…
يا الدنيا …يا الساهرة و الحالمة،
يا لميمة خليك علينا حنينة
بلا غدر…، تمشي السفينة،
و قلت كلامي …
ملي عاودوا ليك خرايف قديمة،
على قبايلي و صحراء جدودي
على النار و كيد الاستعمار،
على حكايات و تاريخ الأوطان
قلت كلامي
و اليوم يا لميمة انت تقولي بلساني و تشوفي بعيني .. بلادي انت و قلت كلامي ….